كيف إنشاء حساب لينكد إن بروفيشنال

ماهو لينكد ان Linkedin 

ببساطه لينكد ان عباره عن منصه من منصات التواصل الإجتماعي في عالم البيزنيس  بس مختلفه عن باقى المنصات  لإنه احترافى أكتر.

انت فى المكان ده بتكون كل حاجه حوليك عباره عن شغل

ايجابيات لينكد إن Linkedin

المكان ده أكبر شبكه علاقات وخبرات ممكن تشوفها فى العالم كله "في العالم مش في بلدك بس ركز 
كل الناس اللى موجودين عليه بيشاركوا خبراتهم وتجاربهم مع غيرهم ويوميا بيكون عليه فرص لكل اللى فوق ده.
الفرص اللى بيوفرها لك الموقع ده او التطبيق ده تستحق انك تديله من وقتك اليومي ولو ربع ساعه زي ما بتضيع أضعاف أضعافهم على فيس بوك وأصحابه.

الاستفادة من لينكد ان

من خلاله تقدر إنك تظهر وتسوق لنفسك بالرغم من الزحام الموجود في سوق العمل، لأن كل ما زادت قدرتك علي إستخدامه بإحترافيه وعرض خبراتك ومهاراتك هتزيد فرصتك في التميز وسط سوق العمل وفي مجالك لإنه أسرع CV مممن تعكس به نفسك للعالم كله مش جوه مصر بس.

تقدر من خلالة إنك تقرأ مقالات قوية ومفيدة جدًا في تخصصك، وتتابع كل حاجه جديده بالنسبة لمجالك وتبقى Up to date بإستمرار.

شايف الشركه اللى بتحلم بيها اللى نفسك تشتغل فيها لما تتخرج؟
تقدر منه انك توصلها لان كل مسؤولين التوظيف او ال HR / Recruiterss موجودين عليه وشايفينه انسب بيئة للتوظيف وانهم يلاقوا موظفين كفاءات 200% من الشركات في العالم بتعلن عن وظائفها بشكل حصري ورسمي علي لينكدان.

لينكدان بيئة عظيمه للعلاقات القوية طويلة المدى تقدر تزود شبكة علاقاتك بسهوله فيه لان كل الناس عارفين انه للشغل وبس .. وزي ما ديما نقول "علاقاتك سر نجاحك" انتشر ياصاحبي عليه قد ما تقدر،

تقدر منه تلاقى فرص تدريب فى الشركات لان برضه كل مسؤولى التدريب موجودين عليه مجرد ما تبحث عن اسم الشركه وتختار من ضمن اختياراتها (مكان عمل الشخص) هتلاقى كل موظفين الشركه ظهروا لك تقدر تعمل connections ممتازه معاهم وكذلك الوضع للمنح والشغل.

المجتمعات او ال Communities اللي عليه مليااانه كنوز ومعلومات تقدر تنضم لمجتمع المجال اللي حابه وتتعلم وتحتك بالخبراء فيه.

تسمع عن Lynda ! من اعظم مواقع ال MOOCs ده تبع Linkedin .. بيتيح لك شهر مجاني تاخد كورسات من اتقل انواعها، لو معاك فلوس هتبقي ملك زما. 
تسمع عن Slideshare ! مليان باوربوينتس و بريزينتيشنز في اي مجال تتخيله حضرتك .. شوف بقي انت وشطارتك تستفيد من النقطه دي في إيه وإزاي يامعلم !

خبراء مجالاتهم بينزلوا مقالات و tips فيها الشفا تقدر تقرأ لك كل يوم مقال واحد بس .. شوف بعد شهر هتبقي ايه 

لو داخل على interview وعرفت إسم اللي هيعملك الانترفيو.. تقدر تدخل تذاكره كويس أوي اوي وتقرأ عنه وميوله واتجاهاته وبيحب اي وبيكره اي تبقي داخل قاعد معاك وانت عاجنه كويس يبقي الوضع اسهل
"النقطه دي بيدفع فيها فلوس في أكبر أيفنتات البيزنس في مصر والعالم كله"

إزاي أجيب شغل او تدريب او منحه عن طريق لينكدان LinkedIn ؟

عشان تعرف تجيب شغل او تدريب او منحه، لازم فى البداية تكون Professional
ومش معنى بروفيشنال انك تنشر بوستز عليه عن الشغل او عن انجازاتك فى التيمات التطوعيه والسلام والسؤال الصح

ازاي اعمل حساب بروفيشنال علي لينكدان ؟

تعالى واحده واحده كده هقولك ازاى تخلى البروفايل بتاعك Professional وتبقى فله وتاخد ال full stars "



(مواضيع) مش زى الفيس سايح على بعضه،
لازم كل Topic منهم تاخد بالك منه اوى اوى وتحط فيه الامور بتنسيق كويس جدا بدقه عاليه ..



 لازم تحط صورتك انت .. مفيش صور ورد وعباد شمس ولا نمر بعيون زرقاء ولا سور جنينه ياكبير 

الصوره لازم تكون formal مش سيلفي، مش مع اصحابك في فرح وتقص نفسك منها.. مش في العربيه والفتيس باين يا حسن  .. يعنى ببساطه صوره خلفيه بيضاء قدر الامكان وببدله وباصص بجسمك كامل مش بالجنب بإبتسامه مقبوله 

لازم وشك يبقى واضح فيها كويسه اوى اوى مش ضرورى جسمك الاهم وشك،



حاول تحط صورة بتعبر عنك (هوايتك المفضلة ، مجال شغلك ، اسلوبك في الحياة .. لوجو لك .. شئ مؤمن به في الحياه ) ..
مثال زي اللي في الصوره لو بتكلم عن نفسي AwaraMOOCs

بقولك : (عشان تغير الCover Photo لازم تفتح LinkedIn من الكمبيوتر مش من الموبايل..)



بيكون هو اول كلمه بيقع عليها عين الشخص اللى بيدخل البروفايل بتاعك, فلازم تكتبه بدقه وبصوره محدده وتكتب فيه انت شغال ايه حاليا.. او ال Position بتاعك ايه بالظبط.



 فى ال Summary بتاعك بتوصف نفسك، انت عملت ايه في حياتك، الوظائف اللي اشتغلتها، انجازاتك، ازاي دايما بتطور من نفسك .. وبتكتب شئ مؤمن به في الحياه وبتسعي له او قضبه مهتم بها وعايش تناقشها في الحياه.

وتكون عظيم اوى لو عندك CV وضيفته فى ال Summary ده.. "لو مكنتش شوفت المقال ازاي تعمل CV بروفشنال من هنا

وعلى راي حزلقوم مابيشكرش في نفسه الا ابليس ماتنساش ياوحش 
ملحوظه ١ : (عشان ترفع ال CV بتاعك ف انت بتحطه فى لينك Google Drive وبعد كده تاخد اللينك كوبى وتحطه ف الSummary بتاعك)

ملحوظه ٢ : ( لما ترفع أي فايل علي Google Drive او غيره لازم تفعل خاصية Link Sharing (مشاركة اللينك) عشان لما اي حد يضغط علي اللينك، الفايل يفتح معاه .. وللاسف دي مشكلة كبيرة معظمنا بيقع فيها ..
لان لو معملتش كدا اللينك مش هيفتح مع أي حد غير حضرتك..

حط رقم موبايلك وايميلك، لإن لو حد عايز يتواصل معاك وهو مش من الConnections بتوعك مش هيقدر يشوف لContacts بتاعتك ولا هيعرف يوصلك "خصوصيه عاليا جدا مش بطيخ زي الفيسبوك"



نفس فكرة طريقة كتابتها فى ال CV بالظبط من الاحدث الى الاقدم وكمان بتضيف معاها سطر او اتنين بال (Responsibilities & Achievements) بتاعك فيها المسؤوليات والحاجات اللى حققتها بالفعل.

لو خريج فريش او لسه طالب ممكن تحط التدريبات اللي حصلت عليها في الشركات المختلفة او في ال internships او ما شبه



الكلية بتاعتك والشهادات اللي حصلت عليها زي الماجستير اذا فيه او الدكتوراة..
لو مفيش بتكتب انك (خريج كلية كذا - القسم - الشعبه - تحتهم التقدير بتاعك).. خليك دقيق لأبعد الحدود.



الانشطه التطوعيه اللى كنت فيها او مازلت فيها..
حاول توضح ايه الانجازات اللي حققتها وازاي قدرت تفيد المكان ده والناس من خلال خبراتك..



هنا بتذكر الSkills اللي عندك ومهاراتك في المجالات المختلفة..



والتاكيد على كلامك من جهة الناس اللى اشتغلت او اتطوعت معاهم..

الناس اللي اتعاملت معاهم ممكن يكتبوا توصيات عنك يعني يذكروا مميزاتك، وممكن تضيف ال Connections بتوعك اللى بتعتبرهم Reference ليك ولشغلك..


وهى بتتكون من كذا جزء:
الCourses
ال Certifications (الشهادات اللى معاك)
"ممكن ترفع الشهادات علي Google Drive وتحط اللينك بتاعهم لو ملهاش لينك ياصديق"
ال Languages اللغه ومستواك فيها ايه..



 رقم تليفونك اللي بتستخدمه في الشغل مش العائلي
 الايميل بتاعك ويكون Formal..
زي مثلا ahmedawara98@yahoo.com
بلاش soso و lolo .com ياوحش 

لينك الفيسبوك بتاعك فى حالة لو كل اللى فوق ده كان مقفول مع الشخص ف يلجاء للفيس بتاعك..

لو عندك اكونت على Wuzzuf حطه.. لو معندكش خلاص..

فى النهايه خلى الاكونت ده بيعبر عنك وعن اللى عملته فى حياتك بالظبط.. بلاش تبالغ وبلاش تكتب اى كلام وبلاش تحشي اى حاجه وخلاص مش مهمه.. بس اكتب كللل حاجه عنك على ال11 Topic اللى فوق..
‏"كأنك بتكتب CV بالظبط" خليك واقعي وشفاف



يعنى تنزل مقالات وتشير وتعلق علي بوستات، وحاول تخلي مشاركاتك مفيده متنشرش اى كلام فاضي او ملهوش لازمه،

لعلمك اللايك اللي بتلايكه بيتحسب عليك وبيتشاف من الناس ف ده بيعبر عن آراءك وعقليتك ونظرتك في الحياه بشكل مرعب .. ف خليك حريص ااوي انت بتلايك ايه وبتشير ايه .. اه معلش ده مستقبل وأكل عيش مش جروب فتكات سيادتك 

حاول تخلي عندك Connections كتيررررررر حتى لو معندكش Followers كتير .. بس بيكون كويس جدا ان يكون عندك ناس تستفيد منهم في مختلف المجالات اللى انت مهتم بيها مش بس في مجالك..

لو محتاج تطلع تدريب او منحه او شغل فى شركه ما ابحث ب اسم الشركه فى ال Search وحدد ان ده المكان اللى الشخص شغال فيه هيظهر لك كل الناس اللى فى الشركه..

تابع الناس اللي بينزلوا وظائف ومحتوي هادف ونصائح مهنية علي LinkedIn ...
هتستفيد منهم جدا..



لازم تدخل فورا بعد البوست ده تعمل اكونت على الموقع وتحط فيه كل حاجه قولناها وتزود كل حاجه مع الوقت لحد ما يبقي متسق مع شخصيتك في الحقيقه ..


للينك الموقع : www.linkedin.com